Jaden Lekòl la se yon pwogram ki pèmèt elèv yo aprann pa pratik sou agrikilti, pwoteksyon anviwònman ak travay ann ekip. Inisyativ sa a kontribye nan devlopman konpetans, oto-sifizans alimantè ak responsabilite sosyal.
Nan kontèks difikilte ekonomik ak pwoblèm sekirite alimantè ki frape anpil fanmi an Ayiti, espesyalman nan zòn riral yo, pwojè Jaden Lekòl la vin kòm yon repons dirab ak edikatif. Inisyativ sa a chèche itilize espas lekòl yo kòm motè chanjman, kote edikasyon, agrikilti ak nitrisyon mache men nan men.
Pwojè a vize entegre pratik jadinaj dirèkteman nan lavi lekòl la, pou pèmèt elèv yo aprann pa aksyon. Atravè aktivite tankou preparasyon tè, pepinyè, konpostaj ak swen plant legim, timoun yo devlope konpetans pratik pandan y ap ranfòse konesans yo sou anviwònman ak pwodiksyon manje.
Anplis dimansyon edikatif la, Jaden Lekòl la gen yon enpak sosyal ak nitrisyonèl enpòtan. Pwodiksyon legim yo kontribye nan amelyorasyon rejim alimantè elèv yo, pandan li ede soulaje chay alimantè fanmi yo. Nan kèk ka, rekòt yo ka vann sou mache lokal la pou sipòte aktivite lekòl la oswa pwojè a.
MAKONEN mete yon gwo anfaz sou fòmasyon ak akonpayman. Elèv yo, pwofesè yo ak kominote a benefisye de sesyon fòmasyon sou teknik agrikòl senp, valè nitrisyonèl legim yo, ak enpòtans pwoteksyon anviwònman an. Apwòch sa a favorize patisipasyon kolektif ak responsablite kominotè.
Atravè pwojè Jaden Lekòl la, MAKONEN ap travay pou bati yon jenerasyon ki pi konsyan, ki gen plis ladrès, epi ki kapab kontribye aktivman nan devlopman lokal la. Se pa sèlman yon jaden legim, men yon espas edikasyon vivan kote lavni ap plante depi jodi a.